A Concellería de Servizos Sociais e Igualdade de Dodro dentro do novo programa "Amodiño.Dodro/2011" organizou unha excursión o pasado 17 de setembro para persoas dependentes, coidadores e persoas con problemas de mobilidade á praia Pedras Negras de San Vicente do Mar, á Toxa, O Grove e Cambados. A excursión tivo unha grande acollida entre a veciñanza e contou cunha alta participación.
Estiveron acompañados en todo momento, para prestarlles a axuda que precisaron dos coidadores, monitores e persoal do concello.
É a primeira vez que en Dodro se organiza unha excursión para este colectivo e os dependentes gozaron moito desta saída agradecendo a súa organización, xa que algúns había anos que non saían das súas casas.
Puideron gozar da praia e algúns deles realizaron algúns exercicios acompañados dun monitor e pasearon pola illa da Toxa visitando a fábrica de xabóns.
Compartiron entre charlas unha animada comida no Grove e pola tarde gozaron dun paseo en Cambados e un descanso nas terrazas. A Concellería de Servizos Sociais e Igualdade séntese satisfeita de traerlles "un día diferente" a estas persoas, da grande acollida deste programa e do agradecemento e satisfacción que demostraron tanto os dependentes coma os coidadores. Organizará ao longo do ano e dentro deste programa diversas excursións e saídas lúdicas para eles.
